
大寶伏藏TD821ཐུགས་རྗེ་ཆེན་པོ་ཡང་སྙིང་འདུས་པའི་བརྒྱུད་འདེབས་ཐུགས་རྗེ་མཁའ་ཁྱབ་བཞུགས་སོ། །ཐུགས་ཆེན་ཡང་འདུས། བརྒྱུད་འདེབས།
22-1-1a
༄༅། །ཐུགས་རྗེ་ཆེན་པོ་ཡང་སྙིང་འདུས་པའི་བརྒྱུད་འདེབས་ཐུགས་རྗེ་མཁའ་ཁྱབ་བཞུགས་སོ། །ཐུགས་ཆེན་ཡང་འདུས། བརྒྱུད་འདེབས།
༄༅། །ཐུགས་རྗེ་ཆེན་པོ་ཡང་སྙིང་འདུས་པའི་བརྒྱུད་འདེབས་ཐུགས་རྗེ་མཁའ་ཁྱབ་བཞུགས་སོ། །ཀུན་བཟང་སྣང་བ་མཐའ་ཡས་ཆོས་ཀྱི་སྐུ །པདྨ་རྒྱལ་པོ་རིགས་ལྔ་ལོངས་སྤྱོད་རྫོགས། །རིགས་དྲུག་འགྲོ་འདུལ་མཚོ་སྐྱེས་སྤྲུལ་སྐུ་ལ། །གསོལ་བ་འདེབས་སོ་ཐུགས་རྗེ་མཁའ་ཁྱབ་ཤོག །རྡོ་རྗེ་བཙུན་མོ་གསང་འཛིན་མཁར་ཆེན་བཟའ། །འཇིག་རྟེན་མགོན་པོ་སྤང་སྟོན་ཆོས་ཀྱི་དབང་། །འཇའ་འོད་སྐུར་གཤེགས་མ་ཎི་རིན་ཆེན་ལ། །གསོལ་བ་འདེབས་སོ༴ སྔ་འགྱུར་བསྟན་པའི་རྒྱལ་མཚན་སེང་གེའི་སྒྲ །ཐུགས་རྗེ་ཆེ་དངོས་དཔལ་ལྡན་ཀཿཐོག་པ། །སྣང་བཞི་མཐར་ཕྱིན་ཚུལ་ཁྲིམས་འབུམ་པ་ལ། །གསོལ་བ་འདེབས་སོ༴ ཐེག་དགུའི་ཆོས་མཛོད་འབུམ་གྱི་སྒོ་འབྱེད་མགོན། །མཁས་ཤིང་གྲུབ་བརྙེས་བུ་འབོར་ཡེ་ཤེས་མཚན། །ཕྱོགས་མེད་འགྲོ་འདུལ་བྱང་སེམས་ཆོས་རྗེ་ལ། །གསོལ་བ༴ ཤེས་རབ་གསུམ་དང་དབང་ཕྱུག་བརྒྱད་ཀྱི་མཛོད། །མངའ་བདག་ཐུགས་སྤྲུལ་པཎ་ཆེན་པདྨ་དབང་། རིག་འཛིན་གྲུབ་མཆོག་ཀརྨ་གུ་རུ་ལ། །གསོལ་བ༴ བདུད་ཀྱི་གཡུལ་འཇོམས་བློ་གྲོས་རྒྱལ་མཚན་འཛིན། །ཆོས་ཀུན་དབང་འབྱོར་དྲི་མེད་ཡེ་ཤེས་ཅན། །གསང་བདག་དཔའ་བོ་ཕྲིན་ལས་ལྷུན་གྲུབ་ལ། །གསོལ་བ༴ བཀའ་གཏེར་ཤིང་རྟ་
22-1-1b
ཆོས་རྒྱལ་གཏེར་བདག་གླིང་། །རྒྱལ་བའི་གདུང་འཚོབ་རིན་ཆེན་རྣམ་པར་རྒྱལ། །བསླབ་གསུམ་དབང་ཕྱུག་ཨཱོ་ཌཱི་ཡ་ན་ལ། །གསོལ་བ༴ གསང་ཆེན་ཕྲི༵ན་ལ༵ས་སྤེལ་མཛད་རྣམ༵་རྒྱལ༵་མཚན། །པ༵དྨ༵ས་བྱིན་བརླབས་དབ༵ང་བཞིའི་རྒྱལ༵་ཐབས་འཆང་། །སངས་རྒྱས་བསྟན་སྐྱོང་ཀུན་དགའི་འདྲེན་མཆོག་ལ། །གསོལ་བ་འདེབས་སོ་ཐུགས་རྗེ་མཁའ་ཁྱབ་ཤོག །འཇ༵མ་དཔལ་དབྱ༵ངས་དངོས་མཁྱེ༵ན་ནུས་བརྩེ༵་བའི་དབང་། །སྨིན་གྲོལ་བཅུད་སྦྱིན་རྩ་བའི་བླ་མ་དང་། དཀྱིལ་འཁོར་ལྷ་ཚོགས་མཁའ་འགྲོ་དམ་ཅན་ལ། །གསོལ་བ་འདེབས་སོ་ཐུགས་རྗེ་མཁའ་ཁྱབ་ཤོག །འཁོར་འདས་དབྱེར་མེད་ལྟ་བའི་གདིང་ཐོབ་ཅིང་། །སྟོང་ཉིད་སྙིང་རྗེ་སྒོམ་གྱི་རྩལ་ཆེན་རྫོགས། །མཁའ་ཁྱབ་འགྲོ་སྒྲོལ་སྤྱོད་པ་མཐར་ཕྱིན་ཏེ། །འཇིག་རྟེན་མགོན་པོའི་གོ་འཕང་མྱུར་ཐོབ་ཤོག །ཅེས་པ་འདིའང་ཡིག་དྲུག་པ་བློ་གྲོས་མཐའ་ཡས་ཀྱིས་སྒྲུབ་ཐབས་མཛེས་རྒྱན་དུ་བྲིས་པ་དགེ་ལེགས་འཕེལ།། །།


